Siglir tar il cuntegn

Header

Navigaziun

Al Aassad refusa las rinfatschas da crim da guerra.
Legenda: Al Aassad refusa las rinfatschas da crim da guerra. Keystone
cuntegn

Exteriur Assad: «Jau n’attatg naginas persunas, jau defend ellas»

Il president da la Siria Baschar al-Assad è persvadì che sias truppas n’èn betg la raschun che millis da persunas fugian ord la Siria.

La raschun principala sajan ils terrorists, sco per exempel l’organisaziun terroristica «Stadi islamic», quai ha ditg Assad en ina intervista cun la «Rundschau» da SRF.

Per il dictatur sirian èn las rollas en il conflict da la Siria repartidas cleramain: La regenza - ed uschia el sez - defendian il pajais cunter «terrorists, ch'èn marschads en Siria per auters pajais», uschia Assad. Il vest sustegnia entant ils terrorists per vegnir liber da tscherts presidents e da remplazzar quels cun marionettas, che correspundian a las atgnas intenziuns. Cuntrari garanteschian «amis da las Siria», sco la Russia, l'Iran e la China ch'il terrorissem na gudognia betg.

Assad refusa crim da guerra

Assad ha plinavant refusà las reproschas che la regenza siriana mazzia civilists en la citad dad Aleppo. Sche la regenza mazzass ils agens civilists, fissia la maioritad da la societad cunter ins. «Jau n'attatg naginas persunas, jau defend ella.», uschia Assad.

Plinavant n’haja la Siria betg duvrà armas chemicas cunter l'atgna populaziun.«I na dat gnanc ina singula cumprova che l'armada siriana haja duvrà armas chemicas.» Il rapport da las Naziuns Unidas che demussia quai, na saja betg credibel, uschia il president sirian vinavant.

Ins sto crair vidlonder ch'ins gudognia la guerra.
Autur: Baschar al-Assadpresident sirian

Tar la schliaziun dal conflict vesa Assad tant la necessitad d'ina via militara sco er diplomatica. Cun Al-Kaida, la Al-Nusra u il Stadi Islamic na saja ina «schliaziun politica» betg pussaivla. Quels hajan lur atgnas persvasiuns ed ina ideologia disgustusa. Perquai stoppian els vegnir cumpattids. Cun partidas politicas ch'èn prontas da dar giu lur armas a favur da la segirezza e stabilitad da la Siria, saja in dialog però pussaivel.

A medem temp è il dictatur sa mussà da la vart dal victur: Ins stoppia crair vidlonder ch'ins gudognia la guerra, ch'ins possia defender il pajais, uschia Assad. Sch'ins na craja betg quai, perdian ins.

RR novitads 06:00