Siglir tar il cuntegn
cuntegn

Exteriur Arrestaziun da Puigdemont: Protestas violentas en Catalugna

Suenter l'arrestaziun da l'anteriur president al cunfin tudestg escalescha la violenza en la Catalugna.

  • Carles Puigdemont è vegnì arrestà al cunfin da la Germania cun il Danemarc.
  • En la Catalugna èn tar protestas cunter l'arrestaziun bleras persunas vegnidas blessadas.
  • Il glindesdi vegn la dretgira a decider sche Puigdemont vegn en arrest d'inquisiziun u betg.

L'anteriur president da la Catalugna Carles Puigdemont vegnì arrestà la sonda tar il cunfin tudestg cun il Danemarc.

Il glindesdi decida la dretgira lura, sch'el vegn en arrest d'inquisziun. Ses advocat beltg Paul Bekaert quinta cun ina liberaziun sut cundiziuns.

Nagina controlla da rutina

Puigdemont saja stà da viadi da la Finlandia enavos en la Belgia, nua ch'el viva dapi l'october en exil. El haja probablamain tschernì da viagiar cun l'auto per pudair evitar controllas a l'eroport. Che las guardias da cunfin hajan prendì ora el, saja pli probabel betg stà en connex cun ina controlla da rutina. Ins suppona che la giustia spagnola haja avertì las autoritads localas.

Arrestaziun grazia a cumond d'arrest internaziunal

Il venderdi passà aveva il tribunal suprem da la Spagna avert ina procedura penala cunter Puigdemont ed auters politichers da la Catalugna pervia da rebelliun. Uschia avevan ins reactivà il cumond d'arrest internaziunal ch'ins aveva retratg il december 2017.

Protests violents a Barcelona

Tar protestas en la Catalugna cunter l'arrestaziun da l'anteriur president catalan Carles Puigdemont en la Germania èn almain 100 persunas vegnidas blessadas. Tranter questas er plirs policists. Quai rapportan servetschs da salvament sin Twitter. Sulet a Barcelona èn passa 90 persunas vegnidas blessadas. Là èn la dumengia saira almain 50'000 persunas idas sin via per protestar. I ha dà confruntaziuns violentas cun la polizia.

RR novitads 14:00++