Siglir tar il cuntegn
cuntegn

Exteriur Arrestà ulteriur suspectà da terror a Paris

L'um duai avair organisà armas per in attentat planisà per l'entschatta december. La polizia aveva pudì impedir quest attentat.

La citad da Paris en tschajera - la citad è anc adina mira dad attatgas da terror.
Legenda: La citad da Paris è anc adina mira dad attatgas da terror. Reuters

Sco l’agentura da novitads franzosa AFP scriva saja l’um da 31 onn tranter auter er vegni arrestà pervi da la commembranza en organisaziuns scumandadas. El duai esser stà responsabel per organisar armas per in attentat.
Tar ina razzia da terror a Strassbourg e Marseille avant intginas emnas aveva la polizia chattà fastizs da DNA dal suspectà. En tut èn uss tschintg umens vegnids arrestads en consequenza da questa razzia. Ils umens hajan planisà attatgas sin pliras miras, tranter auter er sin il martgà da Nadal sin la Champs-Elysée a Paris.

Prolungà stadi d'urgenza

La Frantscha ha annunzià da prolungar il stadi d'urgenza fin suenter las elecziuns presidialas, vul dir, fin la stad 2017. La smanatscha cuntinuanta entras il terrorissem fetschia necessaria questa decisiun ha ditg il nov primminister Bernard Cazeneuve. Il stadi d'urgenza lubescha da scumandar la sortida, da far perquisiziuns e da decretar arrests da chasa senza ina decisiun da la dretgira. Dapi las attatgas terroristicas a Paris il november 2015 cun 130 morts ha la Frantscha il stadi d'urgenza.

RR novitads 17:00/18:00