Arrestà trais persunas en Germania – suspect da terror

Forzas spezialas da la polizia tudestga han fatg in'acziun gronda per arrestar trais commembers probabels da la gruppa da terror Stadi islamic en il Bundesland Schleswig-Holstein. Para han ils trais umens ina relaziun cun las attatgas da Paris il novmber passà.

Forzas spezialas da la polizia da la Germania.

Legenda da maletgs: Var 200 policists e forzas spezialas da la polizia èn stadas en acziun. Keystone

Ils trais Sirians vegnan suspectads d’esser vegnids en Germania sin cumond dal Stadi islamic e spetgian uss sin ordinaziuns, ha ditg la procura publica generala. Ad els vegn rinfatschà d’esser commembers d’ina organisaziun da terror en l’exteriur. «Clers indizis mussan ch'ils trais umens èn arrivads en l'Europa cun agid da la medema organisaziun sco ils attentaders da Paris.» Quai ha ditg il minister dal intern da la Germania Thomas de Maizière. Era ils pass dals umens derivian da la medema funtauna.

Daners e handys cun spezials programs da communicaziun

Ils umens da 17, 18 e 27 onns avevan cuntanschì la Germania il november passà via la Tirchia e la Grezia. Els eran en possess da pass, plirs millis dollars e telefonins cun programs spezials da communicaziun.

Enfin a 200 policists da la polizia federala e d'ulteriurs corps da polizia eran sa participads a questa acziun.

RR novitads 12:00