Las armas atomaras daventan puspè pli impurtantas. Quai resulta dal rapport annual da l'Institut per la perscrutaziun da la pasch Sipri a Stockholm. Bain giaja il dumber d'armas atomaras en ils arsenals mintg'onn enavos, la reducziun da las armas giaja però adina pli plaun vinavant.
Il dumber dad armas atomaras sin l'entir mund è sa reducì da l'entschatta dal 2018 fin l'entschatta dal 2019 per radund 4%. I sa tracta qua dentant cunzunt dad armas pli veglias da las qualas la Russia ed ils Stadis Unids desistian sin basa da contracts internaziunals.
L'institut Sipri ha dentant observà che las armas atomaras daventan puspè pli impurtantas en las strategias da segirtad e dals militars. Perquai sajan ils stadis cun armas atomaras vi da modernisar lur sistems. In mund senza armas atomaras na saja uschia vinavant betg da spetgar.
Sper las Russia ed ils Stadis Unids possedan er la Gronda Britannia, la Frantscha, la China, l'India, il Pakistan, l'Israel e la Corea dal Nord armas atomaras.
RR novitads 06:00