Arabia Saudita ha executà in spiritual schiit enconuschent

Il pajais ha exequi la paina da mort da bleras persunas ch'eran sentenziadas per terrorissem ni per provocar violenza. Tranter ils 47 exequids è il schaich spiritual schiit Nimr Baker al-Nimr, quai ha il ministeri dal intern da l'Arabia Saudita confermà.

demonstrants portan in maletg d'in spiritual schiit

Legenda da maletgs: L'october 2014 portan demonstrants in maletg dal spiritual Nimr al-Nimr ch'è vegnì executà. Reuters

Al-Nimr era in dals manaders da las protestas schiitas en l'ost dal pajais la primavaira 2011. El valeva sco adversari da la monarchia sunita da l'Arabia Saudita.

Reacziuns vehementas

L'execuziun dal prominent spiritual schiit ha chaschunà reacziuns vehementas dals Schiits en ils pajais vischins. Il pussent ajatollah iranais, Ahmad Chatami ha ditg che l'Arabia Saudita vegnia a pajar in «aut pretsch». - Da Schiits iracais e dal Libanon, sco er dals rebels da Huthi en igl Jemen è medemamain vegnì critica massiva ed indignaziun. En il Bahrain hai dà demonstraziuns.

Iran ha avertì

L'Iran il pli grond pajais schiit aveva gia averti a l'Arabia Saudita dad exequir la paina da mort da al-Nimr. Sche la paina da mort cunter il spiritual vegnia exequida, vegnia l'Arabia Saudita a pajar in aut pretsch, ha ditg il viceminister da l'exteriur da l'Iran, Hossein Amir Abdollahian. Sia execuziun pudess danovamain distatgar revoltas tar la minoritad schiita en il pajais.

Era l'organisaziun per ils dretgs umans, Amnesty International, ha crititgà en il passà che l'Arabia Saudita dovria la paina da mort sco instrument politic cunter la minoritad schiita.

RR novitads 10:00/14:00