Il concern da tecnologia – Apple ha vendì dapli iPhones l'ultim quartal. Oravant tut han ins vendì meglier che quintà il nov iPhone X. Uschia ha Apple pudì augmentar il gudogn da quartal sin prest 14 milliardas dollars. Il quartal, l'onn avant eran quai anc 11 milliardas. Quai communitgescha il concern american.
Grazia iPhones dapli gudogn e svieuta
Apple ha vendì totalmain 52,2 milliuns iPhones. Quai che munta in augment da 3%. La svieuta è schizunt creschida per 16% sin passa 61 milliardas dollars. La gronda part da quella va sin il conto dals iPhones.
Il pretsch en media d'in iPhone ha uschia cuntanschì 728 dollars. El è dentant restà sut il record da 796 dollas ord la vendita dal quartal da Nadal. Avant in onn era il pretsch en media anc 655 dollars.
RR novitads 09:00