Anteriur premier Olmert puspè sentenzià

En l'Israel ha ina dretgira declerà culpaivel l'anteriur primminister Ehud Olmert en in ulteriur cas da corrupziun.

Ehud Olmert (amez)

Legenda da maletgs: L’onn passà era Ehud Olmert gia vegnì sentenzià en in auter cas a 6 onns praschun. Keystone

Cunquai ha la dretgira a Gerusalem annullà in’anteriura sentenzia. Il chasti vegn fixà pli tard.

Ehud Olmert duai avair acceptà d'in um d'affars american cun ragischs giudaicas sur onns tschientmillis da dollars. Ils daners sajan vegnids pajads per part en bar en cuvertas. Durant quest temp era Olmert l'emprim president da la citad da Gerusalem e silsuenter minister da commerzi.

Gia sentenzià en in auter cas a 6 onns praschun

Il 2012 era Olmert l’emprim vegnì declerà liber en quest cas. La pli auta dretga aveva dentant ordinà da reprender il cas. L’onn passà era Olmert gia vegnì sentenzià en in auter cas a 6 onns praschun. Fin uss n’ha el dentant betg stuì ir en praschun, perquai ch’el ha contestà la sentenzia.

Cupitgada da regenza pervi da reproschas da corrupziun

Las differentas reproschas da corrupziun cunter Olmert avevan chaschunà l’atun 2008 la cupitgada da sia regenza e manà a novas elecziuns. Dapi il 2009 regia en l’Israel la regenza orientada a dretg da Benjamin Netanjahu.

RR novitads 12:00