En privel na saja l'Uniun europeica betg il mument. Quai di Stefanie Walter, la politologa e professura a l'Institut per scienza da politica da l'Universitad da Turitg.
Ma ella saja uschè ferm sut squitsch sco anc mai: Crisa da finanzas, crisa da l'euro, crisa da fugitivs, commembers sco la Pologna e l'Ungaria che na sa tegnan betg vi da las reglas da l'UE, il Brexit ed ussa midaments a la testa da dus dals pli impurtants pajais da l'UE.
Squitsch vegn era da moviments populistics
En divers pajais da l'UE èn partidas populisticas vegnidas pli fermas ils ultims mais. En Gronda Britannia han els accelerà la decisiun dal Brexit. En Germania è l'Alternativa per la Germania (AfD) vegnida pli ferma, en Frantscha il Front National enturn la candidata per il presidi Marine Le Pen ed en l'Italia il moviment Cinque Stelle enturn il comicher Beppe Grillo che pretenda uschè svelt sco pussibel novas elecziuns suenter la demissiun dal primminister Matteo Renzi.
La politologa avertescha: Sche la Frantscha avess dad eleger Marine Le Pen sco lur nova presidenta fiss in referendum per sortir da l'UE pussaivel.
In Frexit fiss probabel la fin da l'Uniun Europeica.
En l'Austria percunter n'ha il moviment anti-europeic betg gì success tar las elecziuns dal presidi il cumenzament da december. Ils Austriacs han elegì Alexander van der Bellen che sustegna l'Uniun Europeica.
Il Brexit è stà in schoc
La politologa e professura da l'Institut per scienza da politica a l'Universitad da Turitg, Stefanie Walter, ha dentant constatà anc in auter svilup suenter il Brexit.
Il Brexit ha mussà si per tge che l'UE stat insumma e quant svelt ch'i po esser a fin.
Suenter la decisiun dals Englais da vulair sortir da l'Uniun europeica saja l'acceptanza per tala puspè s'augmentada en la gronda part dals pajais commembers.
Sche l'augment da l'acceptanza per l'UE suenter il Brexit possia dentant franar ils moviments populistics en ils pajais commembers saja tuttina grev da dir, di Stefanie Walter.
Era l'elecziun da Trump procura per malsegirezza
L'UE na cumbatta dentant betg mo cun problems interns, era l'elecziun da Donald Trump sco nov president dals Stadis Unids haja augmentà la pressiun sin l'Europa. Il pli malsegir saja ses plan dad «America first», dad in isolaziunissem american.
Uschia haja l'USA gia adina giugà ina rolla decisiva sco stabilisatura da l'Europa. Quai mussia in sguard en l'istorgia, di la politologa Stefanie Walter.
70 onns senza guerra n'ha quai anc quasi mai dà en l'Europa. Ina situaziun che pudess dentant era puspè sa midar.
Per evitar ch'i pudess puspè dar conflicts tranter ils pajais europeics dettia quai mo ina soluziun: da lavurar ensemen economicamain uschè stretg sco pussaivel. La scienza haja numnadamain mussà, che pajais che hajan stretgas relaziuns da commerzi fetschian pli pauc guerra in cun l'auter.