Siglir tar il cuntegn
Inhalt

Exteriur Anc ina schanza – ultimatum per Katar vegn prolungà

Cun prolungar l’ultimatum reageschan l’Arabia Saudita ed ils auters stadis arabs ad ina proposta dal Kuwait, ch’intermediescha en il conflict al golf. Quai rapporta l’agentura da novitads statala da l’Arabia Saudita sa referind ad ina decleraziun dals stadis.

Vista en il studio dad Al-Dschasira.
Legenda: Il Katar duai serrar ses emettur da televisiun Al-Dschasira. Keystone

Oriundamain è l'ultimatum scadì da mesanotg. Ses cuntegn: Sch’il Katar veglia entrar puspè en relaziuns diplomaticas cun L’Arabia Saudita, l’Egipta, il Bahrain ed ils Emirats Arabs Unids, haja el dad accumplir 13 pretensiuns.

Katar ha respus uffizialmain

Tranter auter duaja il Katar serrar l'emettur da novitads Al-Dschasira ed interrumper las relaziuns diplomaticas cun l'Iran.Tenor l'agentura da pressa franzosa AFP haja il Katar deponà il glindesdi sia resposta uffiziala al catalog da pretensiuns da ses adversaris tar l'emir da Kuwait.

Il cuntegn da la resposta n'è anc betg vegnì communitgà.

Germania sa vesa betg en la rolla dad intermediatura

Entant ha la regenza tudestga detg da betg vulair esser intermediatura en la crisa al Golf. Quai ha communitgà in pledader dal minister da l’exteriur Sigmar Gabriel. Gabriel è al mument en visita tar ils stadis al Golf. Si’emprima staziun è l’Arabia Saudita.

La Germania stimia l’intermediaziun da l’Emir dal Kuwait. Ella tema che la crisa dal Katar porschia ils proxims dis anc dapli «potenzial d’escalaziun».

RR novitads 06:00+