Il WEF parta però anc adina dal fatg ch’i vegni stgaffì dapli plazzas che quai ch’i vegn destruì. La clav saja la furmaziun da collavuraturas e collavuraturs per novas incumbensas.
Fin 85 milliuns plazzas van a perder fin il 2025
Tenor l’analisa svaneschan tar las interpresas grondas e mesaunas en ils 26 pajais ch’èn vegnids intercurids radund 85 milliuns plazzas fin il 2025. Cunzunt plazzas en la contabilitad e l’administraziun vegnian automatisadas e digitalisadas, uschia ils experts. Bun la mesadad da las persunas che salvan lur plazzas ston però schlargiar lur savida dal fatg.
Da l’autra vart quinta il WEF ch'i vegn aifer il medem mument però er creà 97 milliuns novas plazzas; Tranter auter en la tgira ed en ils secturs da l’intelligenza artifiziala, la tecnologia e cuntegns da medias creativs.
44% da las lavurs pon vegnir fatgas en il homeoffice
En ina retschertga han 80% dals managers inditgà ch'els veglian accelerar la digitalisaziun e l'introducziun da novas tecnologias. 43% quintan d'uschia spargnar plazzas. Ils patruns da lavur vesan plinavant realistic che 44% da las lavurs pon en futur vegnir fatgas a chasa. Sa participads a quella retschertga èn schefs e managers da 300 firmas cun otg milliuns collavuraturs.