Siglir tar il cuntegn

Header

Navigaziun

L’ambassadur russ Andrej Karlow barmier
Legenda: L’ambassadur russ Andrej Karlow ch’è mort suenter in’attatga. Reuters
cuntegn

Exteriur Ambassadur russ en la Tirchia mora suenter attatga

Tar in'attatga cun arma ad Ankara è l'ambassadur russ Andrej Karlow mort. Il ministeri da l'exteriur russ ha confermà che l’ambassadur saja mort pli tard en l'ospital.

Tenor il minister da l'intern tirc sa tractia tar l'attentader d'in policist indigen da 22 onns. L'um ha sajettà giu Karlow en ina galaria durant che lez ha pledà per l'avertura d'in'exposiziun da fotografias.

Sin videos da l'exposiziun è da vesair sco l'attentader cloma "Allahu Akbar" - Dieu è grond - cura che l'ambassadur è per terra. Ed el menziunescha era Aleppo e la Siria. Pliras ulteriuras persunas èn medemamain vegnidas blessadas tar l'attatga.

Putin ed Erdogan vulan ils tirafils

Suenter il mazzament da l'ambassadur russ ha il president russ Wladimir Putin annunzià ina tschertga intensiva suenter ils tirafils. Els stoppian savair tgi che haja manà il maun da l'assassin ha ditg Putin tenor l'agentura Interfax. El ha cumandà da furmar ina gruppa d'investigaders che duain examinar l'attentat ensemen cun las autoritads tircas. Il president tirc Recep Tayyip Erdogan è s'exprimì sumegliant.

Ils davos dis avevi adina puspè dà protests avant l’ambassadas da l’Iran e da la Russia. Ils demonstrants han crititgà il sustegn da quests dus pajais per l’offensiva da la regenza siriana cunter ils rebels en la citad da Aleppo. La populaziun tirca è indignada da l’offensiva da las truppas sirianas.

RR novitads 20:00