Per diagnostitgar Alzheimer a temp datti nova speranza. Perscrutaders dal Giapun e da l'Australia han tenor atgnas indicaziuns fatg pass impurtants en il svilup d'in nov test da sang, per predir a temp la malsogna. Quest test po confermar in protein ch'è cumpiglià vi da l'origin dad Alzheimer. Il test saja stà en passa 90% dals cas exact.
Actualmain ston ils medis duvrar proceduras bler pli cumplitgadas per diagnostitgar Alzheimer. Proceduras ch'èn charas, e che mussan resultats forsa pir cura che la malsogna è gia rutta ora. In simpel test da sang fiss surtut er d'avantatg per l'industria da farma, che pudess uschia chattar pli simpel pazients pussaivels per far tests cun medicaments novs.
RR novitads 14:00