Almain 42 morts pervi dal ciclon gigant

Il ciclon da la categoria 5 - la pli auta categoria - è fruntà sonda sin las inslas en l'Ocean Pacific. El ha laschà enavos destrucziuns enormas.

Plaunet sa mussan las dimensiuns da la devastaziun tras il ciclon sin las inslas da Fidschi.

Legenda da maletgs: Plaunet sa mussan las dimensiuns da la devastaziun tras il ciclon sin las inslas da Fidschi. Reuters

Trais dis suenter ch'il ciclon Winston è furià sur las inslas da Fidschi vegn la dimensiun da la catastrofa adina pli clera. Almain 42 persunas èn mortas, quai tenor indicaziuns da las autoritads localas.

En il vitg Kade sin l'insla Koro sajan tut ils bajetgs vegnids devastads. Er la baselgia e la scola. Quai ha ditg Akapusi Tuifagalele, il directur da l'Uffizi per protecziun en cas da catastrofas. Las Naziuns Unidas quintan cun in lung temp da reparaziun en il paradis da vacanzas en il Pacific dal sid.

Pli grond ciclon ch'è vegnì mesirà enfin oz

Millis da persunas han stuì fugir dal pli grond ciclon che ha insacura tutgà las inslas. La regenza dal Fidschi aveva appellà als abitants a la costa da sa proteger. Ella aveva declerà la regiun sco regiun da catastrofa ed ordinà in scumond da sortir. Numerusas persunas avevan chattà suttetg en in dals 750 alloschis provisorics.

La sonda è il ciclon Winston tutgà sin terra franca e quai cun spertadads da vent fin 325 km/h. Las inslas Fidschi sa chattan en l'Ocean Pacific var 2'000 kilometers en il nord da la Nova Zelanda.

RR novitads 6:00