Siglir tar il cuntegn
Inhalt

Exteriur Almain 14 morts tar sajettim en California

En il Stadis Unids hai dà in ulteriur sajettim cun bleras unfrendas. Pliras persunas hajan assaglì in bajetg en la California. Tenor indicaziuns da la polizia èn almain 14 persunas mortas, almain ulteriuras 17 persunas èn blessadas.

policists avant autos da pumpiers che bloccheschan las vias
Legenda: Polizia e pumpiers han serrà l'areal enturn il bajetg assaglì e segireschan las vias da San Bernardino en l'aglomeraziun da Los Angeles. Keystone

Ils attentaders cun vestgadira da protecziun hajan assaglì il bajetg, sajettà e sajan suenter fugids cun in auto, communitgescha la polizia. Experts per bumbas examineschian ina materia suspectusa en il bajetg, in'instituziun per persunas cun impediments.

Tenor indicaziuns da la polizia èn duas persunas, in um ed ina dunna, en unifurmas militaras vegnidas sajettadas giu sin la fugia. In’ulteriura persuna suspectada è vegnida arrestada, quai communitgescha il schef da la polizia da la citad San Bernardino. In policist saja vegnì blessà tar la persecuziun da las persunas suspectadas.

Nagin act da terror

Tenor la polizia federala FBI possian ins excluder in act da terror. En mira dals attentaders saja stà ina instituziun sociala per persunas cun impediments a San Bernardino, en l'aglomeraziun da Los Angeles. E sco i para saja vegnì tar ina dispita durant ina festa en il bajetg.

La polizia appellescha a la populaziun da San Bernardino da restar a chasa, e betg ir per las vias. Bajetgs ed instituziuns publicas èn vegnidas serradas. Da las raschuns per ils attentats na datti naginas infurmaziuns.

Obama pretenda puspè leschas pli restrictivas per armas

Il president dals Stadis Unids, Barack Obama, ha suenter questas attatgas repetì sia pretensiun, da far pli restrictivas las leschas per armas en ils Stadis Unids. "Nus duvrain leschas severas per armas, controllas pli resolutas da las persunas che vulan cumprar armas; quai di il saun giudizi", uschia Obama en la televisiun americana CNN.

I na dastgia betg esser pussaivel che in e scadin po ir en la butia e cumprar in'arma. Nagliur sin il mund dettia quai uschì savens delicts da violenza cun armas sco en ils Stadis Unids, ha ditg Obama.

L'emna passada aveva in um assaglì ina clinica per aborts en il stadi federativ Colorado ed aveva sajettà enturn. Là eran mortas 3 persunas.

RR novitads 06.00