Tenor l’armada russa duaja dar mintga di da las 10:00 a las 13:00 ina pausa da fieu per Aleppo. Uschia duajan las organisaziuns d’agid avair access a las 300’000 persunas serradas en la citad assediada. Quai ha communitgà il ministeri da defaisa russ.
Tema dad ina catastrofa umanitara ad Aleppo
Organisaziuns d’agid teman ina catastrofa umanitara ad Aleppo. La metropola economica dad ina giada stat en il center da la guerra civila en Siria. Dapi dis na datti pli aua currenta en la citad assediada – e quai tar temperaturas da 40 grads.
Emprima verdura per Aleppo suenter emnas
La mesemna era arrivà l'emprima giada dapi il cumenzament da la bloccada dad Aleppo avant pliras emnas in transport cun mangiativas en ils quartiers controllads da rebels.
Il transport relativ pitschen cumpigliava surtut verdura frestga, ha communitgà il post d'observaziun sirian per ils dretgs umans. La rauba furnida na tanschia dentant betg per ils var 300’000 umans che vivan en il territori controllà dals rebels. Els vegnan assediads dapi la mesadad da fanadur da las truppas sirianas.
RR novitads 17:00 +