Il secretari general da l'ONU Ban Ki Moon duai far pass urgents per che las Naziuns Unidas ed autras organisaziuns relevantas pon survegliar las acziuns d'evacuaziun ord la part da la citad ch'era fin ussa occupada dals rebels. Plinavant duain las organisaziuns era rapportar da la situaziun dals abitants che restan en la part bloccada d'Aleppo.
Evacuar è puspè pussaivel
Dapi la dumengia saira funcziuna puspè l'evacuaziun d'umans or da l'ost da la citad. Las ultimas uras han var 4’500 persunas pudì bandunar la part en l’ost da la citad d’Aleppo. Almain 50 bus sajan stads en acziun, han communitgà l’ONU ed il post d’observaziun sirian per dretgs umans.
Premissa è vegnida ademplida
La premissa per l’evacuaziun d'ulteriurs civilists ord Aleppo è stada, ch’era persunas dals lieus schiits Fua e Kafraja vegnian salvadas. En quest punct èn la regenza e l'opposiziun sa cunvegnids. Tenor indicaziuns dal post d’observaziun han diesch bus transportà var 500 persunas davent da quests dus lieus.
Evacuà chasa d'orfens
47 uffants d'ina chasa d'orfens èn era en segirezza, tenor l’organisaziun d’agid per uffants Unicef èn intgins da quels blessads e pateschan d’avair gì memia pauc da baiver.
Millis anc serrads en
Dapi che las evacuaziuns han cumenzà l'emna passada, han ins transportà var 13'000 persunas or dals territoris controllads dals rebels. Quest'indicaziun fa il post d'observaziun sirian per dretgs umans. Las Naziuns Unidas quintan che radund 30'000 persunas sa chattan anc en ils territoris controllads dals rebels.
RR novitads 06:00++
