Aleppo: Bus per evacuar ils umans traplads en viadi

Tenor l’agentura da pressa siriana uffiziala Sana è vegnida reprendida l’evacuaziun dals umans traplads ad Aleppo. Uschia hajan sa mess en viadi la dumengia bus en il reduit dals rebels en la citad siriana Aleppo.

Persunas sin in auto.

Legenda da maletgs: Persunas da l’ost dad Aleppo rivan dador la citad - ina fotografia dals 16 da december, fatga dad Aleppo 24, ina gruppa che stat datiers als rebels. Keystone

Ils bus sajan en viadi en ils quartiers da Zabdiyé, Salaheddine, al-Machad et al-Ansari en l’ost dad Aleppo sut la supervisiun da da la Mesaglina Cotschna ed il Comité internaziunal da la Crusch Cotschna. Els duajan prender si a quels «che restan dals terrorists e da lur famiglias» scriva l’agentura siriana. Il reschim sirian dovra il pled «terrorists» per discurrer dals rebels.

Venderdi era l'evacuaziun da la part en l'ost d'Aleppo vegnida interrutta. Las Naziuns Unidas stiman ch'anc radund 30’000 persunas èn bloccadas en l'ost da la citad. Ils rebels e la regenza siriana eran sa cunvegnids ier da cuntinuar cun l'evacuaziun.

RR novitads 12:00+