Siglir tar il cuntegn
cuntegn

Exteriur Alea iacta est: Asterix ed Obelix cumparan per la 37avla giada

Uss è ella al kiosk: La 37avla ediziun dal comic Asterix. Per quella èn Asterix ed Obelix en l'Italia ed han sco usità da cumbatter ils Romans. Questa giada en ina cursa cun char e chaval tras tut l'Italia, la «Transcaliga».

Asterix ed Obelix sin siu char a chavagl.
Legenda: L'entira istorgia tracta d'ina cursa cun char e chaval tras l'Italia. RTR

Sco tar tut las aventuras dals dus Gals Asterix ed Obelix datti er en la pli nov'ediziun istorgia numerusas parallelas tranter il mund dals Romans e quel dad ozendi.

Cun la quadriga en la «Transcaliga»

Uschia ha er la situaziun da partenza probablamain ina ni l'autra parallela reala: En l'Italia dal temp dals Romans èn las vias en in schlet stadi. Per renovar ellas mancan ils daners, perquai ch'il senatur «Lactus Bifidus» ha cugliunà. Suenter che las reclamaziuns sa plunan, va Bifidus en l'offensiva.

El vul organisar ina cursa cun char e chavals (per latin «quadriga») tras l'entira tiara per mussar che las vias èn tuttina bunas. Cäsar ha plaschair da questa idea, vul dentant exnum ch'in Roman gudogna la cursa. La cursa maina tras tut il stival talian (per latin «caliga») – ed ha num perquai «Transcaliga».

extract 37avla ediziun Asterix
Legenda: Il cumbat tranter ils Gals ed ils Romans stattan era en quest comic en il center. RTR

Asterix ed Obelix a la CEBIT

Las parallelas cun temas actuals accumpognan a las lecturas ed ils lecturs tras tut las 46 paginas da la nov'aventura. Uschia gioga per exempel l'emprima scena cun ils Gals sin ina fiera che ha num CEBIT sco la messa d'informatica a Hannover. La CEBIT tar Asterix ed Obleix è tenor l'ediziun tudestga ina fiera per «CEltisches Brauchtum und innovative Technik».

Era tar la visita a Venezia vegn tractà in tema actual. Là discurran Asterix ed Obelix cun ils indigens davart la midada dal clima.

Ord l'archiv:

Legenda: Guardar il video Asterix per rumantsch. Durada 02:23 minutas.
Or da Actualitad video dals 19.10.2017.

RR actualitad 11:00