Il reschim dal president sirian Baschar al-Assad accepta l'armistizi sin il qual la Russia ed ils Stadis Unids èn sa cunvegnids. Quai rapporta l'agentura da novitads statala «Sana» e sa basa sin il ministeri da l'exteriur a Damaskus.. La cunvegna na vala però betg per il Stadi islamic e la front d'Al-Kaida - Al-Nusra. Il cumbat cunter las gruppas da terror vegnia manà vinavant. L'armistizi duai cumenzar ils 26-02-2016 da mesanotg.
Betg mo pli pauc violenza
Sco quai ch'il minister da l'exteriur dals Stadis Unids John Kerry ha ditg, na reduceschia quist armistizi betg mo la violenza, mabain promovi er l'agid humanitar per ils lieus ch'en serrads en. Quai agid saja urgentamain necessari. Plinavant sustegnia l'armistizi er il process da transfurmaziun tar ina regenza che prendia serius ils basegns dal pievel sirian. In'emprima cunvegna per in armistizi a partir dal venderdi passà aveva fatg naufragi.
La cunvegna è ina schanza realistica per far fin al mazzar en Siria.
Il president russ Wladimir Putin quinta cun sustegn internaziunal .suenter la cunvegna per in armistizi en Siria.La cunvegna tranter Moscau e Washington possia esser in exempel per ina collavuraziun en il cumbat cunter il terror, uschia Putin en in pled a la televisiun. I saja ina schanza realistica per far fin al mazzar en Siria.
Assad fixescha elecziuns per ils 13 d'avrigl
Il president dal reschim sirian Baschar al-Assad ha surprendentamain fixà elecziuns dal parlament per ils 13 d'avrigl. Sco quai che l'agentura da novitads statala Sana rapporta, sortia quai d'in decret dal president. En Siria ha quai dà l'ultima giada elecziuns dal parlament il matg 2012.
RR novitads 20:00 / 23:00