Siglir tar il cuntegn
Inhalt

Exteriur Air Berlin è insolventa

La Air Berlin ha annunzià insolvenza. La segund gronda societad aviatica da la Germania ha ditg ch'ins saja vegnì a quest resultat, suenter che l'acziunari principal Etihad haja declerà da betg vulair metter a disposiziun ulteriur sustegn finanzial.

Aviun da l'Air Berlin.
Legenda: Quant ditg sgola la Air Berlin anc? Keystone

Gist durant il temp va vacanzas ha la segund gronda societad aviatica - la Air Berlin - annunzià insolvenza. L'acziunari principal Etihad Airways ha curt avant annunzià da na betg pli sustegnair la societad aviatica finanzialmain. La regenza tudestga segirescha il manaschi da sgol durant il temp da vacanzas cun in credit transitoric da 150 milliuns euros. Cun la Lufthansa ed anc in'autra societad aviatica, che na vegn betg numnada, datti gia discurs da tractativas. Questas tractativas pudessan gia en intginas emnas ad esser terminadas.

La Air Berlin stat finanzialmain gia dapi onns betg pli bain. L'acziunari principal Etihad Airways ha adina puspè attribuì credits. En tut è la Air Berlin vegnida sustegnida cun credits en l'autezza da milliardas. La societad aviatica dad Abu Dhabi è dapi il 2011acziunaria ed è actualmain sa participada cun 30 pertschient a l'Air Berlin.

Per l'Air Berlin na dettia uschia betg ina prognosa d'existenza positiva pli.

Critica da la societad aviatica Raynair

La societad aviatica irlandaisa per sgols bunmartgads Ryanair crititgescha las mesiras per salvar la Air Berlin. La dumonda d'insolvenza saja vegnida arranschada cun la finamira che la Lufthansa possia surpigliar Air Berlin, uschia in pledader da Ryanair. Ina surpigliada cuntrafetschia a las reglas da concurrenza tudestgas e da l'Uniun europeica. Tenor la Air Berlin datti il mument contractivas per vender parts da la firma.

RR novitads 14:00++