Siglir tar il cuntegn
Inhalt

Exteriur AI accusescha la Siria da millis execuziuns

La regenza siriana ha sco i para laschà executar fin a 13’000 persunas en ina praschun militara. Questas indicaziuns fa Amnesty International, l'organisaziun per ils dretgs umans.

Lynn Maalouf da Amnesty International
Legenda: Infurmà davart las reproschas ha Lynn Maalouf da Amnesty International. Keystone

Las persunas sajan vegnidas pendidas dal 2011 fin il 2015 en ina praschun militara datiers da la chapitala Damascus. Las execuziuns sajan succedidas senza procedura legala. La gronda part da las unfrendas sajan stadas persunas civilas.

Supprimer parairis betg giavischads

La finamira dals malfatgs descrits en il rapport saja stà, da destruir en la populaziun siriana mintga parairi betg confurm a la lingia da la regenza, sco Amnesty International scriva. I sa tractia da tortura, violaziun u da privar nutriment, aua e provediment medicinal. Ed AI va da quai anora che la regenza siriana cuntinuescha cun talas praticas fin uss.

Communitad internaziunala duai agir

Il rapport da Amnesty International sa basa sin intervistas cun 84 perditgas. Discurrì ha AI tranter auter cun praschuniers, survegliaders, derschaders ed advocats. L’organisaziun per ils dretgs umans pretenda da las Naziuns Unidas da betg targlinar d’intercurir quests crims sgrischaivels.

RR novitads 06:00