Siglir tar il cuntegn

Header

cuntegn

Exteriur Agid per citad siriana Duma

In convoi cun rauba d'agid medicinala ha cuntanschì la citad bloccada Duma en Siria. Ils camiuns hajan tranter auter purtà latg per pops, insulin ed auters medicaments, rapporta l'agentura da novitads statala siriana.

Las Naziuns Unidas han confermà ch'il convoi d'agid ha cuntanschì la citad. La citad Duma sa chatta en l'ost da la chapitala Damascus e vegn dapi il 2013 controllada da rebels.

Plirs tozzels umans gia morts

La Mesaglina cotschna siriana scriva, ch'il convoi haja purtà a Duma 5'400 cuppas cun latg per pops, 2'000 stgatlas cun insulin, provediment per far 250 dialisas sco era medeschina per malsognas cronicas.

Tenor l'ONU vivan actualmain radund 486’000 persunas en citads u regiuns controlladas da rebels. Plirs tozzels da questas persunas èn gia mortas perquai ch'ellas n’avevan betg avunda nutriment u n'han betg pudì vegnir tractadas cun medicaments.

RR novitads 06:00

Artitgels legids il pli savens