Siglir tar il cuntegn
Inhalt

Exteriur Afghanistan: Marcantamain dapli cumbattants SI morts tras bumba

La bumba gronda ch’ils Stadis Unids han bittà giu en l'Afghanistan ha chaschunà dapli unfrendas che supponì: Las autoritads localas discurran dad almain 94 cumbattants da la milissa terroristica Stadi Islamic SI che sajan vegnids mazzads.

Tenor il guvernatur en la provinza pertutgada da Nagarhar en l’ost da l’Afghanistan haja la bumba mazzà 92 cumbattants dal Stadi Islamic SI. In auter uffizial discurra da 90 dschihadists mazzads. Cun quai è la cifra trais giadas uschè gronda sco annunzià curt suenter l’attatga.

I n'haja betg dà unfrendas civilas

Malgrà che la milissa dal SI haja endrizzà ses zops tar chasas civilas da la populaziun afghana, n'haja tenor las funtaunas uffizialas betg dà unfrendas civilas. L’armada americana aveva bumbardà la gievgia passada in sistem da zops e tunnels dal SI. Tenor il ministeri da defensiun afghan sajan vegnids destruids tar l’attatga tant zops ‘strategics’ dals islamists sco er in sistem da tunnel profund sut la terra.

Emprim diever da la megabumba...

Grond’attenziun aveva chaschunà il tip da bumba duvrà per quell’acziun. La GBU-43/B Massive Ordnance Air Blast (Moab) è la pli gronda bumba betg nucleara en l’arsenal american ed ha in pais da radund 10 tonnas. Ella è vegnida duvrada per l’emprima giada en in’attatga militara.

... vegn crititgà da Hamid Karsai

L’anteriur schef da stadi afghan Hamid Karsai ha condemnà l’attatga. Ses pajais vegni duvrà sco territori da test per novas armas, ha el crititgà sin Twitter.

La fin d’emna passada era in schuldà american mort en in’ operaziun cunter il SI en la provinza da Nangarhar.

RR novitads 09:00