Siglir tar il cuntegn
Inhalt

Exteriur AfD nominescha vicepresident sco topcandidat per elecziuns

Alexander Gauland è l'economa Alice Weidel èn elegids sco topcandidats per il cumbat electoral. Quai han decis ils radund 600 delegads da la partida populistica da dretga a lur di da partida a Cologna.

Purtret dad Alexander Gauland.
Legenda: Alexander Gaulad è tranter auter elegì sco topcandidat da las elecziuns en Germania. Keystone

Gia ordavant aveva la scheffa da l'AfD (Alternative für Deutschland), Frauke Petry annunzià da desister d'ina candidatura. Suenter ch'ella ha fatg ina terrada la sonda durant la discussiun davart l'orientaziun da la partida en futur è ella stada anc pli franca da questa decisiun.

En l'AfD hai l'ultim temp adina puspè dà problems tranter las persunas al chau da la partida. Gauland sustegna il schef da partida da Thüringen, Björn Höcke. Petry aveva mess en moviment in proceder d'exclauder quel da la partida suenter ch'el aveva dà in pled il schaner. Gauland na sustegna betg quest proceder.

Höcke era s'exprimì a moda disfavuraivla davart il monument commemorativ dal Holocaust a Berlin. Plinavant vegn fenfatschà ad el da na betg far ina differenza tar la partida extremista da dretg NPD. Gauland refusa renfatschas ch'i dettia tendenzas rassisticas e xenofobas en l'AfD. El vala sco ina da las persunas cun la pli bler'influenza en la partida.

Critica da l'Islam publica

Alice Weidel è lung temp stada en il lager da Petry ed haja empruvà da vegnir tras là sco experta da finanzas ed economia. Tar la dumonda co ir enturn cun la crisa da l'Euro è ella dentant vegnida en carplina cun i schef da partida Jörg Meuthen.

L'ultim ha Weidel era fatg anc pli sctrict sia critica envers l'islam. Uschia remproscha ella a la giunta directiva dals muslims da na betg esser sa distanzià avunda da la Scharia dal temp da crap e dal fundamentalissem religius.

RR novitads 15:00

Las elecziuns parlamentaras en Germania èn quest atun.