Siglir tar il cuntegn

Exteriur Adesiun a l'UE: Dispita tranter Vienna ed Ankara escalescha

En vista als ultims svilups en la Tirchia suenter l'emprova da putsch pretenda l'Austria in curs pli dir envers la Tirchia. Il chancelier austriac pretenda d'interrumper las tractativas d'adesiun.

Politicher austriac.
Legenda: Il chancelier austriac pretenda ina lingia pli dira da l'UE envers la Tirchia. Keystone

Suenter ch'il chancelier austriac Christian Kern ha pretendì d'interrumper las tractativas per l'adesiun da la Tirchia a l'Uniun europeica, ha la Tirchia renfatschà al socialdemocrat Kern ch'el dovria formulaziuns da l'extrema dretga.

Kern aveva ditg a la l’emettur austriac «ORF» che las tractativas actualas per l’adesiun sajan mo ina «ficziun diplomatica» e ha pretendì in concept alternativ. El ha annunzià da vulair tematisar quai al proxim inscunter suprem da l'UE ils 16 da settember 2016.

UE prenda posiziun

Il president da la cumissiun da l’UE, Jean-Claude Juncker avertescha d’interrumper las tractativas d’adesiun cun la Tirchia. Quai fissia cuntraproductiv il mument, ha el ditg envers l’emettur tudestg ARD.

Avant aveva l’Austria pretendì d’interrumper tut las tractativas per l’adesiun da la Tirchia a l’Uniun europeica. Juncker ha però suttastritgà che la Tirchia na possia il mument betg daventar in stadi commember da l’UE. Quai en vista a la situaziun en il pajais.

Per interrumper las tractativas stuessan tut ils stadis commembers da l’UE decider quai unanimamain.

RR novitads 18:00