Siglir tar il cuntegn
Inhalt

Exteriur A Honduras vegn cuntinuada la dumbraziun

In'emna suenter l'elecziun dispitaivla dal president ha Honduras puspè cumenzà a dumbrar vuschs.

Avant in'emna han ils Hondurans pudì eleger in president. Il cumenzament da las dumbraziuns è Salvador Nasralla da la sanestra stà al chau da l'elecziun. Cun dumbrar ora dapli vuschs, ha il president actual Juan Orlando Hernández dentant suatà ed è stà cun 42,9% levamain davant Nasralla cun 41,4%.

Zelaya sustegna Nasralla

Quel spustament ha manà a protests violents e sblundregiadas. Ils aderents da Nasralla renfatschan a Hernández dad avair cugliunà. Perquai ha la regenza stuì interrumper las dumbraziuns la gievgia ed ha il venderdi proclamà in scumond da sortir tranter las sis la damaun e las sis la saira. La dumengia hai dà protests da massa. A quels ha l'anteriur president Manuel Zelaya motivà. Encunter el era vegnì fatg in putsch militar il 2009. Almain duas persunas èn vegnidas mazzadas e numerusas persunas èn vegnidas blessadas.

Jau ordinesch a mes pievel honduran ed a mia partida da star paschaivels e spetgar ils resultats da l'elecziun.
Autur: Juan Orlando HernándezPresidenr da Honduras

I vegn cuntinuà cun dumbrar vuschs

Il glindesdi ha la dretgira d'elecziun dentant puspè entschet cun dumbrar vuschs. Tuts dus, Nasralla e Hernández, pretendan il post per sasez. Gia il 2013 aveva il schurnalist da sport Nasralla candidà per la partida anti-corrupziun (PAC) encunter il candidat conservativ Hernández – senza success.

RR novitads 09:00

Honduras

Honduras è in dals pajais ils pli povers e privlus da l'America centrala.