Siglir tar il cuntegn
cuntegn

Exteriur «A Berlin n'è nagin propi stut»

Pli baud u pli tard hajan ils da Berlin fatg quint cun ina tal'attatga – quai din Anna Bott e Philipp Decurtins, dus Rumantschs che vivan e lavuran a Berlin.

Oriund è Philipp Decurtins da Trun. Però gia dapi var tschintg onns abita el a Berlin. El lavura sco informaticher. Suenter la lavur è el ì svelt a chasa senza udir il prim mument insatge da quai ch'è capità. Pir cura che la famiglia e collegas han telefonà per udir sch'i giaja bain cun el, ha el realisà tge ch'era capità. Ed era in di suenter saja il tema sin via u a la lavur las attatgas.

Philipp Decurtins
Legenda: Philipp Decurtins viva dapi var tschintg onns a Berlin. MAD
Tuttenina hai jau survegnì telefons e telefons da parents e collegas che dumandavan mai sch'i va bain. Lura hai jau chapì tge ch'e capità. Suenter hai era jau telefonà a mes collegas per vesair sch'i è tut en urden.
Autur: Philipp DecurtinsInformaticher a Berlin

Auter Anna Bott, l’oriunda Engiadinaisa era vi da pachetar en regalins da Nadal e tadlava radio. Uschia è ella vegnida a savair dal camiun che ha tschiffà la glieud da la fiera da Nadal. Ella va precaut per las vias da Berlin, però betg mo pervi da l’attatga actuala. Suenter las attatgas da Paris e Brüssel hajan ins savì che pli baud u pli tard pudess capitar insatge en la chapitala da la Germania, di l’Engiadinaisa.

Anna Bott
Legenda: Anna Bott MAD
Jau ma fatg schont ponderaziuns cun ir en lieus publics tge che pudess capitar. Per exempel cumenz jau a studegiar nua ir en la U-Bahn, davant u davos, ni sch’jau duai tuttina prender il bus.
Autur: Anna BottEmploiada en ina chasa editura a Berlin

Philipp Decurtins dentant di era ch'i saja ina tscherta retegnientscha per ir en lieus publics. El na craja dentant betg che la glieud vegn ad evitar quels pli savens. El na vul sa laschar manar da la tema u da retegnientschas, di l’informaticher.

RR actualitad 17:00