Siglir tar il cuntegn

Header

Navigaziun

Silvio Berlusconi mussa il det amez durant ina preschentaziun d'in cudesch il schaner 2016.
Legenda: Silvio Berlusconi, durant ina preschentaziun d'in cudesch il schaner 2016. Keystone
cuntegn

Exteriur 80 onns Silvio Berlusconi

En l'Italia è el cult - il giubilar che festivescha oz ses 80avel anniversari. Silvio Berlusconi ha dentant surtut fatg furore cun scandals e pannas.

I è vegnì ruassaivel enturn Silvio Berlusconi. Forsa pervi da ses problems da sanadad, ma franc er perquai che sia partida 'Forza Italia' ch'el ha fundà l'onn 1994, n'è insumma betg pli preschenta. Ed er il club da ballape AC Milan ha Berlusconi vendì.

E tuttina è el qua

Il fenomen Silvio Berlusconi è dentant anc adina fitg preschent en l'Italia. Tenor retschertgas haja l'um cun pel brina da solarium, chavels anc adina bel nairs e strusch ina rubaglia, anc adina ina massa fans ed aderents. Franc er perquai ch'el è adina puspè crudà si. Saja quai entras sias partys da sex cun il num 'Bunga bunga' u er entras remartgas deplazzadas.

Conflicts cun la giustia

Adina puspè è Berlusconi vegnì en conflict cun la giustia. Ina giada pervi da sex cun giuvnas minorennas, in'autra giada pervi da omissiun fiscala u corrupziun. Per agitaziun aveva er sia remartga da l'onn 2003 procurà. El aveva ditg ch'il politicher tudestg Martin Schulz fissi ina guardia ideala per in champ da concentraziun.

Sentenzia da l'onn 2013

La stad 2013 è sia carriera politica vegnida franada in pau. Lura ha la dretgira sentenzià Berlusconi a set onns praschun e decidì ch'el na dastgi mai pli avair in uffizi politic uffizial. En praschun n'è il politicher talian dentant mai stà. Tuttina è Silvio Berlusconi, l'um ch'è stà il pli ditg a la testa da l'Italia. En tut ha el regì 2'240 dis, e quai malgrà ses scandals tut a dubel.