Mintga quart uffant sin terra patescha pervi da la fom era en ses svilup da crescher. Pil mument vegn la situaziun classifitgada en nagin pajais cun «gravant». En 50 stadis è la situaziun dentant «seriusa» u «fitg seriusa». Il pli giudim la stgala sa chattan la Republica Centralafricana, il Tschad, Sambia e Haiti. 13 stadis n'ha la «Welthungerhilfe» betg pudì giuditgar perquai ch'els n'han betg avunda datas. Quai èn per exempel pajais en conflict sco la Siria, la Libia ed il Sudan.
Betg mo tristas novas - la situaziun è sa megliurada
Tuttina dettia quai era progress en il cumbat cunter la fom, dapi il 2000 pateschian circa in terz pli paucs umans da la fom, quai malgrà che la populaziun globala creschia. L'index per mesirar quai è bajegià si sin in sistem da punct. La stgala va qua da 0, per ils megliers pajais enfin 100, per ils menders.
22 pajais hajan dumagnà da sbassar lur dumber per la mesadad. Il pli bler success han gì il Myanmar, Ruanda e Cambodscha. En naginas regiuns saja il cumbat cunter la fomaz stagnà.
"Nulla fomaz" è la finamira enfin il 2030
Per cuntanscher las finamiras da l’ONU stoppia uss vegnir intervegni en la prevenziun da crisa e la refurma da l’agricultura. Sper l'infrastructura e la repartiziun dal nutriment stoppian era ils dretgs umans vegnir promovids ed ils dretgs per las dunnas vegnir rinforzads.
RR novitads 15:00