780 milliuns euros n'han strusch gì effect en la Moldavia

La curt dals quints da l'UE metta en dumonda ils agids finanzials per la Moldavia. Ils 782 milliuns euro pajads dapi il 2007 hajan contribuì be a moda limitada a rinforzar l'administraziun publica.

dunnas giuvnas da la Moldavia tegnan en maun la bandiera naziunala

Legenda da maletgs: La fin d'emna ha la Moldavia festivà il 25avel di da l'independenza. Keystone

Il motiv per quai saja, tranter auter, la voluntad politica da las autoritads e mancos tar la planisaziun e realisaziun da programs d'agid. Quai crititgeschan ils controlladers da finanzas en in nov rapport. Els proponan da liar ils agids finanzials pli ferm vid las cundiziuns.

La situaziun politica en il pajais tranter l'Ucraina e la Rumenia è fitg instabila. Pir la fin d'emna passada ha la polizia agì cun gas lacrimogen cunter ils demonstrants che han vulì disturbar ina parada militara per festivar ils 25ave di da l'independenza.

La Moldavia è dapi intgins onns in pajais separà en ina part proeuropeica ed ina part prorussa. Fin ussa n'è betg schlià il conflict da Transnistria. La regiun nua ch'i vegn discurrì russ è dapi il 1992 separà da la Republica Moldavia e vegn dapi lura «protegì» da «truppas da pasch» russas.

RR novitads 08:00