Siglir tar il cuntegn

Header

cuntegn

75 onns suenter Hiroshima Commemoraziun per las unfrendas da Hiroshima

Oz èsi 75 onns che la bumba atomara ha tutgà la citad giapunaisa da Hiroshima. Il secretari general da l'ONU Antonio Guterres ha avertì d’in nova concurrenza d’armament, sco el ha ditg a chaschun d’ina ceremonia da commemoraziun.

Entras separaziun, disfidanza e la mancanza da dialog smanatschia ina nova rivalitad nucleara, ha Guterres ditg. Stadis che possedan armas nuclearas sajan vid modernisar lur arsenals e sviluppar armas novas e privlusas, ha el cuntinuà. Perquai saja il ristg memia grond che quellas armas vegnian er duvradas – saja quai intenziunadamain, per sbagl u entras ina valitaziun sbagliada.

Eliminar tut las armas atomaras

La suletta via per evitar in ulteriur diever d’ina arma atomara saja d’eliminar quellas, ha il secretari general da la ONU pretendì vinavant. Ils 6 d’avust 1945 ha in bumbardader dals Americans («Enola Gay») bittà l’emprima bumba atomara («Little Boy») durant la guerra, quai sur Hiroshima en il Giapun. 70'000 persunas èn mortas immediat. Enfin la fin da l’onn 1945 han – tenor stimaziuns – radund 140'000 persunas pers la vita pervi da las consequenzas da la bumba.

Segunda bumba trais dis pli tard

Ils 9 d'avust han ils Americans bittà giu ina segunda bumba atomara sur il Giapun. Questa giada sin la citad da Nagasaki. Curt suenter han ils Giapunais capitulà e la Segunda Guerra mundiala è stada a fin.

Ozendi è Hiroshima in simbol global da guerra – e pasch.

audio
Per tadlar curt e cumpact
ord RTR Audio dals 06.08.2020. Maletg: RTR
laschar ir. Durada: 1 minuta 26 Secundas.

RTR novitads 06:00

Artitgels legids il pli savens