Siglir tar il cuntegn
cuntegn

Exteriur 71 morts tar la disgrazia d'aviun en la Columbia

L’aviun cun 77persunas a bord, tranter quellas ina squadra da ballape brasiliana, saja svanì dal radar datiers dal culm El Gordo en la regiun da la citad columbiana Medellín. Tenor infurmaziuns uffizialas avevan ils pilots annunzià avant la crudada d'avair problems cun l'electronica.

Persunas che sa fatschentan d'ina persuna blessada.
Legenda: Forzas da salvament mainan ina persuna blessada en l’ospital. Keystone

L'aviun che vegniva da la Bolivia era svanì datiers dal culm El Gordo dal radar. El era en la fasa d'atterrar. Tenor l'eroport da Medellín sa chattavan 68 passagiers e 9 commembers da la squadra a bord.

En l'aviun sa chattava era la squadra da ballape brasiliana da Chapecoense. La squadra da l’emprima liga brasiliana avess gì la mesemna l’emprim gieu da la runda finala da la cuppa sidamericana cunter il club Atlético Nacional da Medellín.

Tranter las persunas che han pudì vegnir salvadas sa chattan tenor indicaziuns da las forzas da salvament quatter giugaders da ballape da l’equipa da Chapecoense, ina flight attendant ed in schurnalist. Las ulteriuras 71persunas èn tenor indicaziuns da la polizia columbiana mortas.

Il president brasilian Michel Temer ha ordinà suenter la disgrazia ina malencurada naziunala da trais dis.

Chattà ils noda-sgols

Entant han ins chattà ils dus noda-sgols, las uschenumnadas black-boxes. Quai communitgescha il ministeri da transport columbian. Uschia sperian ins da chattar la raschun per la catastrofa.

Il prim aveva il directur da l'autoritad aviatica columbiana ditg che l'aviun pudessi esser crudà pervi da memia pauc carburant. I saja dentant era pussaivel ch'autras raschuns hajan manà a la tragedia.

Cuntrari a las emprimas communicaziuns erian mo 77 persunas a bord e betg 81. 4 persunas n'hajan betg fatg il viadi sco planisà.

RR novitads 07:00 / 12:00 / 23.00

Ina carta d'ina part da la Columbia
Legenda: Il lieu da la disgrazia è var 120 kilometers en il sid da la citad Medellín. Google Maps