Siglir tar il cuntegn

Exteriur 7 pumpiers blessads tar grond fieu en l'Europapark

Tar in incendi en l'Europapark a Rust èn 7 pumpiers sa blessads levamain. Ils radund 25'000 visitaders han pudì vegnir evacuads senza incaps. Las lavurs da stizzar han durà l'entira notg.

vista sur l'Europapark, en il center dal maletg da vesair in grond fieu, bler fim nair e spess
Legenda: La halla en fieu cumplain. Ina part dal parc è vegnida evacuada. Keystone

Il dumber dals blessads suenter l’incendi en l’Europaparc a Rust è s’augmentà sin 7. Tuts blessads sajan pumpiers lev blessads, han confermà las autoritads. Fin uss era vegnì discurrì da 3 blessads.

Investigaziuns marschan

Uss hajan era ils experts cumenzà cun las lavurs da chattar la raschun per l’incendi, ha communitgà la procura publica. Entschiet ad arder aveva quai la sonda en in magazin. Davart la summa dals donns na datti anc naginas indicaziuns.

Europaparc vul puspè avrir dumengia

Tenor la polizia ha l'incendi donnegià parts dals indrizs en il parc. Tranter auter quella dals «Pirats da Batavia». Radund 500 persunas da salvament e gidanters èn en servetsch. Ils responsabels vulan avrir la dumengia il parc da divertiment, cun excepziun dals indrizs pertutgads.

RR novitads 21:00