Siglir tar il cuntegn
Inhalt

Exteriur 65 schurnalists èn vegnids mazzads pervi da lur lavur il 2017

En blers pajais sa mettan schurnalists en privel sch'els rapportan davart corrupziun u criminalitad organisada. Il 2017 ha quai custà la vita a 65 schurnalists.

Mauns che scrivan sin ina tastatura.
Legenda: En blers pajais èsi malsegir da rapportar davart corrupziun u criminalitad organisada. Keystone

La mesadad dals 65 schurnalists, ch'èn il 2017 vegnids mazzads pervia da lur lavur, èn vegnids mazzads ordaifer regiuns cun conflicts cun armas. Tenor l'organisaziun «Reporter ohne Grenzen» è ils pajais il pli malsegir per schurnalists la Siria. Suandà dal pajais:

  • Siria: 12 morts
  • Mexico: 11 morts
  • Afghanistan: 9 morts
  • Irac: 8 morts
  • Filippinas: 4 morts

Mazzads, rapinads, prendids a ferm

Però era per auters schurnalists ha lur lavur gì consequenzas: La fin dal 2017 sa chattan 326 en praschun ed 54 èn vegnids rapinads. Sulet en la Siria sa chattan 22 schurnalists indigens e set schurnalists esters èn ils mauns da gruppas armadas – tscherts gia dapi 5 onns.

La giustia da la Tirchia tegna a ferm ils schurnalists sur lung temp senza sentenzia giudiziala. Uschia è il correspundent tudestg da «Die Welt» Deniz Yücel gia dapi il favrer en praschun – senza ch'i dat in'accusaziun cunter el.

RR novitads 06:00