Siglir tar il cuntegn
cuntegn

Exteriur 6 milliuns uffants na survivan betg ils emprims 5 onns

Bunamain 6 milliuns uffants sin tut il mund èn morts l'onn passà avant ch'els han pudì festivar lur 5avel anniversari. Quai mussa in studi ch'è publitgà en la revista «The Lancet». En ils pajais pertutgads il pli fitg moran en media 90 da 1'000 uffants sut 5 onns.

intgins uffants africans
Legenda: Ils scienziads pretendan in meglier provediment medicinal cunter puntgas, malaria e diarrea (fuira). Keystone

60% dals mortoris tutgan sin be 10 pajais. Tranter quests pajais povers èn tschintg da l'Africa (Angola, Kongo, Etiopia, Nigeria e Tansania). Il pli savens èn puntga (malcostas) la raschun per la mort dals uffants. Ils auters tschintg pajais èn en l'Asia (Bangladesch, China, Indonesia, India e Pakistan). Là moran ils uffants il pli savens pervi da cumplicaziuns tar naschientschas prematuras.

Ils auturs dal studi enturn la media Li Liu da la Hopkins Bloomberg School for Public Health cusseglian in meglier provediment medicinal cunter puntgas, malaria e diarrea (fuira) sco era meglierament tar il provediment da l'aua ed il provediment sanitar.

RR novitads 09:00