5 morts pervi d'inundaziuns en Germania

Tar las auas grondas en Niederbayern èn fin uss 5 persunas mortas. Sfunsaders hajan chattà trais baras en ina chasa inundada a Simbach am Inn, quai ha communitgà la polizia. Ina quarta bara è vegnida chattada en in aual

purtret che mussa devastaziuns pervi da auas grondas

Legenda da maletgs: La vischnanca Simbach è vegnida tutgada fermamain da las auas grondas. Keystone

Suenter las grevas inundaziuns en il Niederbayern cun 5 morts valan 4 ulteriuras persunas anc sco sparidas. Tenor la polizia saja da quintar cun il mender.

Parts da Nordrhein-Westfalen èn medemamain inundadas. Pervi da plievgia intensiva han ins installà in stab da crisa. Il livel dal flum Issel è creschì per passa 2 meters, uschia ch'in rempar è periclità.

Era las prognosas per ils proxims dis n'èn betg bunas. Almain fin dumengia restia la zona da pressiun bassa e l'aria d'urizis en la Germania, uschia il servetsch da l'aura tudestg.

Inundaziun en pliras parts dal pajais

Il circul Rottal-Inn ha decretà l'alarm da catastrofa en intginas vischnancas. Radund 250 uffants èn bloccads en la scola a Triftern perquai che las vias n'eran betg pli passablas. Cun bartgas e helicopters èn carstgauns vegnids salvads ord lur chasas, 9'000 tegnairchasas èn senza electricitad.

A Simbach è l'aua plirs meters auta ed ha chaschunà gronds donns. Tenor emprimas stimaziuns munta il donn a plirs milliuns francs. Entaifer sis uras hai dà a Pfarrkirchen sper Triftern 32 liters plievgia per meter quadrat.

RR novitads 22:00