Siglir tar il cuntegn

Header

cuntegn

Exteriur 40 km dal vulcan Agung è la vita normala

En il sid dal vulcan, ordaifer la zona d'evacuaziun da 10 km è la situaziun calma. Quai di Sandra Demonti che viva sin l'insla Nusa Ceningan.

Sco Sandra Demontì di n'hajan els ni da purtar mascras, ni da far autra mesiras da precauziun a Nusa Ceningan. Bun 40 kilometers dal vulcan Agung ch'è smanatscha da rumper ora. Els contemplian dentant la situaziun schebain cun ils agen egls, sco era entras las medias. I dettia cameras che registreschan la situaziun tar il crater.

En ina zona da vulcan n'è in'activitad betg ina surpraisa

Sandra Demonti è calma e descriva la situaziun actuala perfin sco «coola» ed «interessanta». Avant dus onns è la dunna ch'è oriunda da Zuoz emigrada sin la pitschna insla per viver ses semi da sfunsar. Ed ella è da l'avis, ch'i saja da quintar cun da quests scenaris sch'ins sa decidia da viver en ina zona cun 130 vulcans.

audio
Bunura: Discurs live da Bali cun Sandra Demonti
ord Actualitad dals 28.11.2017.
laschar ir. Durada: 5 minutas 30 Secundas.

Era ils turists sin l'insla Nusa Ceningan sajan quiets, fetschian fotografias ed observian la situaziun cun interess. In quità hajan els dentant: La plazza aviatica resta er oz serrada. Sin las rutas da sgol sajan numnadamain da spetgar nivels da tschendra dal vulcan. Uschia en plirs 100 sgols vegnids stritgads e millis turists ston spetgar per pudair returnar a chasa.

Pronts èn cas d'ina erupziun

Anc pertutga l'Agung pia main ils abitants ordaifer la zona d'evacuaziun, uschia Sandra Demonti. Sche il traffic aviatic vegn dentant ad esser bloccà per in temp pli lung, na pertutga quai dentant betg mo ils turists, mabain er ils indigens. Uschia na pon ins per exempel betg transportar nutriment cun aviuns. Era sch'i dettia anc la pussaivladad d'importar nutriment cun bartgas, ha la dunna de Zuoz procurà per reservas. Questa mesira haja ella gia fatg il settember, tar l'emprim alarm.

RR actualitad 08:00

Artitgels legids il pli savens