Ulrich Schmid, professer per la cultura e societad da la Russia da l'Universitad da Son Gagl numna insaquantas parallelas tranter la guerra da la Bosnia dal 1992 e la guerra da l'Ucraina dad oz. Ina parallela saja la brutalitad dals agressurs. En Bosnia hai dà la mazzacra da Srebrenica ed en l'Ucraina è quai capità a Butscha. Uschia dettia en omadus cas in uschenumnà «urbizid», en Bosnia è quai stà Sarajevo, en l'Ucraina Mariupol. E tge che pudess er esser ina parallela tranter las duas guerras, è la fin. El numna quel il scenari «Bosnia».
Cunvegna da pasch
Il 1995 èn las partidas cumbattantas, ils Serbs, ils Bosniacs ed ils Croats s'entupads a Dayton per contrahar ina cunvegna da pasch. Quella ha repartì il territori sin las partidas. Ils Serbs han survegnì la republica Srpska, ils Croats e Bosniacs la federaziun Bosnia Erzegovina. Il problem vid la cunvegna tenor il professer:
La cunvegna da Dayton ha bain chaschunà pasch, dentant ha ella era fatg in donn moralic, perquai ch'ils agressurs èn vegnids remunerads cun survegnir territori.
Il «scenari Bosnia» per l'Ucraina
Per l'Ucraina vuless quai pia dir ch'era l'agressiun da la Russia vegniss remunerada e ch'ins duess per amur da la pasch, dar ils territoris Donezk e Luhansk a la federaziun russa sco republicas. Dentant quant probabel è quai scenari?
Jau pens che quai è senz'auter pussaivel ch'i vegn tar ina tala cunvegna, cunzunt era perquai che l'Ucraina ha forsa nagin'autra opziun cun il temp. Dentant era la Russia sto bainbaud terminar l'attatga sch'ella vul vinavant vender a sia populaziun la guerra be sco ina «operaziun speziala».
Il «scenari Bosnia» è dentant be in da plirs. I dat or da vista da l'Ucraina per la fin da la guerra er anc il «scenari Libanon», che fiss lura in pajais senza structuras che funcziunan. Ubain il «scenari Israel» che munta, che l'Ucraina fiss ina insla da la democrazia en in ambient dad inimis. Ulrich Schmid quinta cun ina schliaziun ils proxims mais enfin forsa 1 ubain 2 onns perquai ch'ils Russ hajan memia paucs schuldads ed ils Ucranais memia paucas armas, uschia che la fin da la guerra saja be pli ina dumonda dal temp.
