Siglir tar il cuntegn
Inhalt

Exteriur 2x Corea dal Sid: Visita Mike Pence ed atgisa Park Geun Hye

Il vicepresident american è sin visita en la Corea dal Sid. L’anteriura presidenta na vegn el betg pli a scuntrar: Quella è vegnida atgisada uffizialmain pervi da corrupziun.

els sa dattan il maun.
Legenda: Il vicepresident american Mike Pence (a san.) ed il president actual da la Corea dal Sid Hwang Kyo-ahn avant lur discurs a Seoul. Keystone

In di suenter l’ultim test da rachetas da la Corea dal Nord ha il vicepresident dals Stadis Unids, Mike Pence, visità la zona demilitarisada tranter la Corea dal Sid e dal Nord.

Pence rinforza l’allianza americana cun la Corea dal Sid

Davant ina gruppa da schuldada americana ha Pence numnà il test ina provocaziun e rinforzà l'allianza cun la Corea dal Sid.

Pence tar la schuldada.
Legenda: Pence tar la schuldada – ils Stadis Unids han staziunà passa 28’000 schuldads en la Corea dal Sid. Keystone

Anteriura presidenta vegnida accusada pervi da corrupziun

In autra istorgia, ch’occupa la Corea dal Sid, èn ils affars sombers da l’anteriura presidenta Park Geun Hye. Ella è vegnida accusada uffizialmain pervi da corrupziun.

L’anteriura presidenta en viadi tar il procuratur public la fin da mars 2017.
Legenda: L’anteriura presidenta en viadi tar il procuratur public la fin da mars 2017. Keystone

La procura publica da la Corea dal Sid rinfatscha ad ella tranter auter dad esser corrupta, dad avair malduvrà ses uffizi e dad avair violà secrets statals. Quai ha communitgà la procura publica.

Park è arrestada

Ils diesch da mars era Park vegnida relaschada da ses uffizi pervi d'in scandal da corrupziun ed avant duas emnas era ella vegnida arrestada.

En il center dal scandal stat ina persuna da confidenza da l'anteriura presidenta. Quella duai avair profità da quai ed incassà donaziuns.

RR novitads 11:00