Siglir tar il cuntegn
cuntegn

Exteriur 27 morts tar incendis a Portugal

Ils pumpiers sajan en blers lieus surdumandads, perquai appelleschan las autoritads a la populaziun da medemamain cumbatter las flommas.

Purtret d'in um che cumbatta il fieu cun ina sadella plain aua.
Legenda: Ils pumpiers èn surdumandads, uss duai la populaziun gidar. Keystone

Pertutgadas èn las regiuns Coimbra, Castelo Branco sco era Viseu en il center dal pajais ed Aveiro en il nord. Er en la provinza da Galizia en il nordvest da la Spagna, sajan almain trais persunas mortas en las flommas.

Las autoritads han perquai appellà a la populaziun da medemamain cumbatter las flommas, damai ch'ins na possia betg dapertut spetgar sin ils pumpiers ch'èn per part surdumandads. En blers lieus en Portugal e la Spagna vegnan las persunas evacuadas da la protecziun civila u da pumpiers e purtads en alloschis d'urgenza. En il Portugal discurran las autoritads da radund 100 funtaunas d'incendis, en Spagna da radund 150.

Onn fitg desastrus per il Portugal

Pervi da la sitgira e la chalira che regia en il Portugal è la situaziun vinavant fitg privlusa. En il Portugal datti adina puspè incendis durant la stad, quest onn è dentant stà specialmain desastrus. Mez zercladur èn 64 persunas mortas d'incendis en il center dal pajais. Dapli che 250 ulteriurs èn vegnids blessads. Enfin la fin settember èn gia radund 216'000 hectaras guaud arsas.

RR novitads 14:00