Il dumber dals morts saja entant creschì sin almain 19. Numerusas persunas sa chattan probabel anc sut las ruinas da las chasas ch'èn sbalunadas, dapli che 1'000 èn vegnidas blessadas. In privel da tsunamis n’hai tenor las autoritads meteorologicas betg dà.
L'ovra atomara da Sendai che sa chatta en la vischinanza na saja betg vegnida donnegiada, hai num vinavant. Sendai è il sulet reactur ch'è il mument vid la rait en il Giapun.
Millis schuldads en acziun
Suenter il terratrembel inizial ha quai dà numerus terratrembels posteriurs, tranter quels er dus da la fermezza 6,4. Experts dal post d’observaziun per terratrembels american USGS han avertì d’ulteriurs terratrembels. Per la saira vegni quintà cun ferma plievgia, e quai pudess chaschunar ulteriuras bovas.
La sonda duain ulteriurs 15’000 schuldads arrivar en la regiun. Plinavant duain ulteriurs schuldads, pumpiers e sanitaris vegnir en acziun. Tenor rapports da l’emettur NHK ha quai er dà ina pitschn’erupziun dal vulcan Aso. Il fim era muntà fin radund 100 meters.
RR novitads 06:00 / 11:00