Siglir tar il cuntegn

Header

cuntegn

Exteriur 16 arrests tar pliras perquisiziuns da chasas en Belgia

Tar pliras acziuns d’anti-terror suenter las attatgas da Paris ha la polizia da la Belgia arrestà 16 persunas. Tenor indicaziuns da la procura publica è in dals suspectads principals dentant anc adina en fugia.

Las 16 persunas arrestadas duain il glindesdi vegnir preschentadas ad in derschader d'arrest.

Razzias en 19 abizatiuns senza chattar armas u material explosiv

La forza speziala da la polizia ha tenor atgnas indicaziuns fatg razzias en 19 abitaziuns en la regiun da Brüssel. 3 acziuns hai dà en la citad da Charleroi en il sid da Brüssel. Ins n’ha chattà naginas armas u material explosiv, conferma la polizia.

Autoritads da l’UE lavuran

Avrir la box Serrar la box

Las instituziuns da l’UE èn avertas, i valan però mesiras da segirezza e controllas da persunas pli rigurusas. Pliras sesidas n’han betg lieu.

La staziun Brüssel-Schuman, che sa chatta directamain sut il bajetg da la cumissiun da l’UE, resta serrada.

Vinavant stgalim d'alarm 4, metro e scolas èn serradas

Gia per il terz di en seria vala per la regiun enturn la chapitala belgiaisa Brüssel in alarm da terror sin il pli aut stgalim insumma (stgalim 4 da 4). regenza na ristgia betg da sbassar il stadi d'urgenza ord tema d'in attentat sco a Paris. Perquai ha la regenza era rinforzà la polizia e l'armada.

Las scolas sco er la metro restan serradas il glindesdi. Il motiv è in privel da terror «serius e direct», aveva ditg il primminister beltg Charles Michel.

Per il rest dal pajais vala vinavant il segund aut stgalim d’alarm.

Frantscha tschertga terz attentader d'attatga sin Stade de France

La polizia franzosa tschertga perditgas che pon far indicaziuns sur da la terza persunas ch’è sa siglientada en l’aria avant il stadion Stade de France ils 13 da november tar las attatgas da Paris.

Sulet in dals trais attentaders da suicidi è identifitgà senza dubi. Ils dus ulteriurs umens èn para vegnids registrads ils 3 d’october sin l’insla grecca Lesbos. Sper la bara d’in dals umens han ins chattà in passaport sirian.

RR novitads 06:00

Artitgels legids il pli savens