150 unfrendas tar crudada d’aviun

En il sid da la Frantscha è crudà giu in aviun dal tip Airbus A320. I sa tractia d'in aviun da la societad Germanwings, ina figlia da la Lufthansa.

In helicopter en l'aria, davostiers culms cun naiv.

Legenda da maletgs: Ils servetschs da salvament franzos sa rendan cun helicopters en il lieu da la disgrazia. Reuters

La societad aviatica prenda posiziun

La maschina cun 144 passagiers e 6 commembers d’equipa a bord era sin viadi da Barcelona a Düsseldorf. Quai ha ditg il directur da la Germanwings, Oliver Wagner. Fin uss n'hajan els nagins avis sin la raschun da la crudada. Wagner ha era exprimì sia profunda cumpassiun cun ils confamigliars ed ils amis da las unfrendas.

Unfrendas da differents pajais

Tenor la Germanwings èn 67 da las unfrendas burgais tudestgs, tranter quels era ina classa cun 16 scolars e 2 scolasts da Rain dal Nord-Vestfalia. Il dumber possia dentant anc sa midar. Avant aveva la regenza spagnola annunzià, che 45 da las unfrendas sajan da la Spagna. Danunder che las ulteriuras unfrendas derivan, n'è il mument betg enconuschent.

Il president franzos François Hollande ensemen cun il retg spagnol Felipe VI e la regina Letizia a Paris.

Legenda da maletgs: Il president franzos François Hollande ensemen cun il retg spagnol Felipe VI e la regina Letizia a Paris. Keystone

La crudada da l’aviun consternescha

Plirs schefs da stadi han condolà a la Germania. Ed era en la Germania sez ha la chanceliera Angela Merkel, sco era il president Joachim Gauck, exprimì lur condolaziuns a las famiglias pertutgadas.

Nagin signal d’urgenza

La squadra da l’aviun tudestg n’haja betg tramess in signal d’urgenza, quai annunzia la Direcziun generala da l’aviatica civila franzosa. I saja stà la controlla aviatica ch’haja decidì da declerar l’aviun sco sparì suenter ch’il contact era rut giu. I na dettia nagins indizis per in’attatga da terror.

Lieu da crudada è bloccà

Lieu da la crudada saja Digne-les-Bains en la regiun Alpes-de-Haute-Provence, quai è var 100 kilometers en il nordvest da Nizza. I sa tractia d’in lieu mal accessibel, ha il ministeri da l’intern franzos communitgà.

Carta da la Frantscha cun nudà il lieu Digne-les-Bains

Legenda da maletgs: Il lieu da la crudada en il sid da la Frantscha. SRF

Equipas da salvament han cuntanschì il lieu da la disgrazia e confermà che tut ils passagiers da l'aviun crudà sajan morts. La polizia franzosa ha bloccà il lieu da crudada, ed ella quinta da duvrar plirs dis per vegnir a val cun las unfrendas.

Aura strusch ina raschun

L'aura al lieu da la disgrazia era tenor ils servetschs meteorologics da la Frantscha ruassaivla, rapporta la gasetta «Le Monde». Ed il pilot da l'aviun aveva pli che 10 onns experientscha ed aveva fatg pli che 6'000 uras sgols, ha la Germanwings inditgà.

Aviun è 24 onns vegl

Tenor infurmaziuns da la pagina d’internet Airfleets.net è la maschina dal tip A320 vegnì surdada a la Lufthansa ils 6 da favrer 1991, ed è uschia 24 onns veglia.

RR novitads 12:00