Suenter ch'igl è vegnì sajettà en ina scola en il Texas èn almain 10 persunas vegnidas mazzadas. Plirs blessads sa chattian en l'ospital. Tar las unfrendas sa tractia cunzunt da scolars. Quai communitgescha la polizia. Il probabel delinquent è in giuven da 17 onns.
Suenter ils sajets ha la polizia chattà materia explosiva sin l'areal da scola ed ordaifer il campus. Tenor il guvernatur dal Texas haja l'um agì cun duas armas che tutgavan a ses bab.
Gia segunda sajettada en scola quest onn
Igl è gia la segunda sajettada en questa furma en ina scola en ils Stadis Unids il 2018. Ils 14 da favrer aveva in scolar sajettà enturn en sia scola a Florida e mazzà 17 persunas.
Sin Twitter ha il president american, Donald Trump annunzià che quai giaja gia memia ditg uschia en ses pajas e ch'el e sia regenza veglian far tut il pussaivel per proteger ils scolars.
RR novitads 18:00