Siglir tar il cuntegn

Exteriur 1 milliarda euros da l'UE per fugitivs

Ils presidents e schefs dals stadis da l’Uniun europeica han en in inscunter extraordinari decis in agid supplementar da 1 milliarda euros per gidar fugitivs ord la Siria ed ils stadis vischins da la Siria. Quai ha ditg il president dal Cussegl da l’UE, Donald Tusk.

Ils 28 schefs da stadi èn sa spruvads da pledar cun ina vusch.
Legenda: Ils 28 schefs da stadi da l'UE èn sa spruvads da pledar cun ina vusch. Reuters

Ils daners duajan tranter auter vegnir duvrads per il program da nutriment da l’ONU e per l'agid da fugitivs da l’ONU, la UNHCR. Quellas mesiras han tenor la chanceliera tudestga Angela Merkel ina buna raschun:

Pli fitg ch’ins cumbattia las raschuns per la fugia, e pli pauc che persunas sajan sfurzadas da bandunar lur patria. Era saja da communitgar a persunas che fugian be ord raschuns economicas, ch’els n’hajan nagina raschun per protecziun e nagina perspectiva.

Malgrà che las decisiuns na schlian betg la crisa, tutgian ellas tar ils numerus pass necessaris, da ditg Merkel.

Crear «hotspots» per reparter ils fugitivs

Era han ils presidents decis da crear en l’Italia ed en la Grezia enfin november centers da registraziun - uschenumnads hotspots - nua che 160'000 fugitivs pon vegnir repartids sin ils stadis commembers.

RR novitads 06:00