Siglir tar il cuntegn

Header

cuntegn

Exteriur 1'800 ulteriurs policists sin las vias d'Istanbul

Suenter l'emprova malgartegiada da cupitgar la regenza tirca datti grondas midadas en il corp da polizia. E la preschientscha da la polizia en las citads vegn augmentada.

La regenza tirca haja tratg ensemen 1'800 ulteriurs policists en la citad d'Istanbul. Quai rapporta l'agentura da novitads tirca Anadolu. Ils policists specialisads duain segirar cun chars armads las pli impurtantas instituziuns e vias da la citad gronda.

Il schef da la polizia d'Istanbul ha ultra da quai cumandà da sajettar giu senza avertir helicopters nunenconuschents.

13'000 relaschads

Suenter il putsch betg gartegià en la Tirchia èn passa 13'000 emploiads dal stadi vegnids suspendids. Tranter els èn era 30 guvernaturs. Uschia communitgescha l'agentura da novitads tirca Anadolu. La fin d'emna eran passa 6'000 persunas vegnidas arrestadas. Tranter ellas passa 100 generals ed admirals.

La notg sin sonda aveva ina gruppa da militars empruvà da surpigliar la pussanza en la Tirchia. Sin quai ha il president tirc Racep Tayyip Erdogan annunzià mesiras severas cunter ils putschists. En pli vul el era discutar davart la reintroducziun da la paina da mort.

UE è preoccupada

L’Uniun europeica rinfatscha entant a la Tirchia ch’ella n’elavuria betg questa fatschenta tenor il dretg internaziunal. Il cumissari da l'UE, Johannes Hahn ha ditg ch'el saja inquietà che uschè blers derschaders sajan vegnids arrestads. Tenor el saja quest'acziun stada planisada gia dapi lung. La responsabla per ils affars da l'exteriur da l'UE, Federica Mogherini ha admonì da star attent che la Tirchia na volvia betg il dies a la democrazia.

Novitads 11:00 +

Artitgels legids il pli savens