Siglir tar il cuntegn
Inhalt

Exteriur 1,5 milliuns suttascripziuns cunter president da Venezuela

En la Venezuela èn aifer dus dis vegnidas rimnadas 1,5 milliuns suttascripziuns cunter il president Nicolas Maduro. Tenor l’opposiziun sajan uschia pli che ademplidas las premissas per in referendum per relaschar dal president socialistic. Necessarias èn dentant anc dapli suttascripziuns.

L'opposiziun venezolana vul relaschar il president vertent Nicolas Maduro.
Legenda: L'opposiziun venezolana vul relaschar il president vertent Nicolas Maduro. Keystone

En la Venezuela èsi adina pli probabel ch'il president Nicolas Maduro vegn relaschà da ses uffizi. En dus dis han 1,5 milliuns persunas suttascrit in referendum per relaschar Maduro, ha communitgà il manader da l'opposiziun Henrique Capriles.

Neccessarias èn 4 milliuns suttascripziuns

En in emprim pass èn stadas necessarias stgars 195'721 suttascripziuns (1% dals votants). Per ch'in referendum saja pussaivel ston ins en in segund pass rimnar stgars quatter milliuns suttascripziuns (ca. 20% dals votants).

La finamira è pia sin via, dentant anc betg cuntanschida. Sco Capriles ha ditg, saja il president «fitg inquietà» dals schabetgs da las ultimas 48 uras.

Greva crisa regia en la Venezuela

Il pajais cun las pli grondas reservas d’ieli è avant la ruina suenter 16 onns cun ina regenza socialistica ed ina greva crisa d’energia e da provediment regia en la Venezuela. Plinavant ha il pajais mundialmain la pli gronda inflaziun e recessiun.

Il december passà aveva l'opposiziun gudagnà las elecziuns dal parlament.

RR novitads 06:00