Siglir tar il cuntegn
Inhalt

Expo Milano 2015 Pavillon Svizzer è semtgà

L'entschatta matg avra l'exposiziun mundiala a Milaun sias portas. Entant ch'intgins dals 52 pajais cun agen pavillon han retard dovra il pavillon svizzer sulet anc ina "politura" finala. Era il chantun Tessin è en il plan. El ha pudì rimnar ils daners necessaris tar sponsurs privats.

5 umens en vestgadira fina enturn ina chista dal pavillon svizzer
Legenda: Da sanester: Nicolas Bideau, directur dal pavillon svizzer, ed ils commember da las regenzas chantunalas Hans Jörg Trachsel (GR), Manuele Bertoli (TI), Jacques Meilly (VS) e Josef Dittli (UR) a l'avertura da l'emprim etappa dal Giro del gusto. Keystone, Praesenz Schweiz

Il suveran dal Tessin ha refusà il settember 2014 in credit per l'exposiziun mundiala. Per pudair finanziar la preschentaziun communabla cun ils chantuns dal Gottard, Grischun, Uri e Vallais en il pavillon svizzer, ha il Tessin perquai stuì supplitgar sponsurs privats per daners. Ils 1,1 milliun francs sajan rimnads ha communitgà la chanzlia chantunala tessinaisa.

Frantscha senza ustaria, Italia cun retard

Era auters pajais han retard. Il pavillon da la Frantscha sto cumenzar senza in'ustaria, perquai che las lavurs en questa part da l'exposiziun n'èn anc betg terminadas. Uschia è vegnì communitgà ord il consulat general svizzer a Milaun. Il pavillon da l'Italia, il pajais ospitant, pudess schizunt vegnir a fin pir in mais suenter l'avertura. La gasetta taliana "Corriere della Sera" ha planschì che Milaun haja gia survegnì avant 7 onns l'incumbensa per l'exposiziun mundiala. Tuttina na sajan las lavurs anc betg terminadas pervi da corrupziun ed in'administraziun excessiva.