Siglir tar il cuntegn
cuntegn

Elecziuns 2018 Walter Schlegel è l’um da la PPS

Uss èsi uffizial, delegadas e delegads da la Partida populara dal Grischun han nominà il glindesdi saira Walter Schlegel sco candidat per las elecziuns da la regenza grischuna.

Cun 160 vuschs, naginas cuntravuschs e naginas abstenziuns, èn ils delegads suandads la proposta che la suprastanza da la partida aveva preschentà gia avant in mais a las medias.

Il suveran grischun decida lura ils 10 da zercladur, tgi ch’è per ils proxims quatter onns en la regenza grischuna.

La persuna e sias cumpetenzas han persvadì

Plirs delegads han numnà atgnadads da caracter sco fermezzas da Walter Schlegel. Pex. saja el ina persuna fitg sincera u insatgi che fetschia quai ch'el dia ubain er ch'el saja in che resguardia il pitschen «um da la via», quai fetschia impressiun.

... in malpazient ...

Sia flaivlezza saja sia malpazienza sch'i na giaja betg immediat sco ch'el veglia, tradescha l'um grond cun chavels grischs. Er delegadas e delegads han cun in zic studegiar chattà ina u l'autra flaivlezza da lur candidat – malgrà tut la persvasiun. El pudess per exempel vulair gidar a tuts quels che dovrian agid e quai na saja betg adina pussaivel – ins stoppia parter en. Insatgi auter ha accentuà ch'el stoppia en in emprim pass rimnar experientscha en il manaschi politic en cas ch'el vegnia elegì.

Ch'il cumandant da la Polizia chantunala n'è betg exnum in um da l'economia ch'è da principi centrala per la PPS, quai n'ha betg disturbà ils delegads. Il pachet stoppia constar e betg singulas abilitads, uschia l'argumentaziun. Er insatgi che na derivia betg da l'economia possia sa lavurar en en quella.

RR novitads 23:00